ژ هۆزانڤانێن كورد (دلبرین ئەرتووشی)

 

ژ هۆزانڤانێن كورد:

                   دلبرین ئەرتووشی

پەیڤەكا فەر

دگەل رویدان و بوویەرێن دەسپێكا ڤێ سەد سالییێ، ژینا كوردەواری د رەوڕەوا چەرخەكا توند و بلەزدا زڤڕییە، گوهەرتنێن هەمەڕەنگ ئیناینە بەرچاڤ.. لێ ئەڤ رویدانێن تێكوز و تاڤەگر و بەل، ب رەنگەكێ دروست و تەڤایی نەهاتنە سەنگاندن و ڤەكۆلین، و هەتا گەلەك ئالێن زانست و ئەدەبیاتان بێ دەنگ و بێ بزاڤ ماینەڤە، یان هنەك هەر ب یەكجاری نەبوونە... ژبەر پاشكەفتن و كۆرەوەری یا مللەتێ مە و زالبوونا هەردوو دەردێن گران، هەژاری و نەخوێندەوارییێ.

لێ هەروەكو یا رەوایە و تشتەكی نۆرمالە، هۆزانێ هەر جهێ خوە هەبوویە، و د هەموو ئالاندا یا ئامادە و بەرهەڤ بوویە و، ئەو هەرسێ شۆڕەشێن ددیرۆكا ئەدەبیاتا دێریندا هاتین (مەلایێ جزیری، ئەحمەدێ خانی، حاجی قادرێ كۆیی) كەفتنە گەڕا مەندبوونا هێژانی یا چاخێن بەری خوە و چزی و نەمامێن شۆڕەشەكا دی یا ئەدەبی هەلدان و ئەو دەردەو خەم و كەسەرێن گران و خەونێن مللەتی كەفتنە دناڤ سەربوورەكا ئەفراندنێن (گۆران)یدا، لێ ڤەڕێژا دیرۆكێ ناڕاوەستیت و هەر پێشڤەدچیت و نووخوازی یا ژێنێ پێویستی ب شەنگست و ستوون و كەرستێ هەبوونا خوە دبیت، لەو پێدڤی و حاجەتا مللەتێ مە ب دەنگەكێ بلند، زەلال، راستگۆ، شارەزا، زانا، گەرناس و نەڕەڤ هەبوو، ئەرێ ئەڤ هیڤییە بجه هات؟

(هەروەكو پشت راستین كو هەموو هیڤی یێن مللەتێ مە دێ ب جه هێن...) و (جەگەرخوین) بوو ئالاهەلگرێ رێبازەكا پیرۆز، ئاسۆ دویر، بیروڕا پڕ هێژا، سەخلەت و سیمایێن بها گران... و بەرهەم و فەهم و سەرجەمێن وی بوونە شۆڕەشەكا نوی دناڤ ئەدەبیاتێن مەدا،... و شاگرد مشەبوون دناڤ خویندنگەها وی یا وەلاتپەروەری و ئەدەبیدا. لڤێرە مە نەڤێت دویر و درێژ ل سەر ڤێ شۆڕەشا ئەدەبی ب ئاخڤین، لێ یا مە پێ مەبەست و، ژێرا ڤان رووپەلانا رەش دكەین... سەربوور و بزاڤ و دەستكردێ وان شاگرد و رێڤینگانە، یێن ئەو رێك گرتی و تێدا خەتیبن چ كێم یان زۆر، چ باش یان ناڤنجی، چ سپی یان بەلەك، و ئەڤان بزاڤان بێخینە بەرچاڤ و، وەكو تێكست و ژێدەر ژ بۆ خەمخۆر و رەخنەگران بەرهەڤ بكین و هندی ژمە بهێت ئەم وەریسێ دیرۆكا ئەدەبا كوردی درێژ و رەسەن و موكوم بهێلین... و ئەو شاگردێ نهۆ ئەم ژین و بەرهەم و خەباتا وی پێشكێش دكین، هۆزانڤانێ مللی یێ بەهرەمەند (دلبرین ئەرتووشی)یە،

 

دلبرین ئەرتووشی كییە؟

ناڤێ وی یێ بدروستی (مەلا سدیق، لاوێ مەلا یووسفێ لاوێ مەلا عەبدوللایە، كو ئەو كوڕێ مستەفایێ ئەرتووشییە، هۆزانڤانێ مە لسالا (1908ز) ل گوندێ (ئاشكا) ل جهێ ژیریكییان، ل دەڤەرا هەكارییان هاتیە دونیایێ، ناڤێ دایكا وی (ئارەپ)ە، كچا (بەهدر)ییە، كو ئەو ژ ژمالا كەرەڤانێ یەحیایێ ژیریكی بوویە.

ژبەركو باب و باپیرێن وی هەر دەرسدار بوونە ل وی گوندی، وی ژی خویندنا خوەیا ئایینی هەر ل وێرێ ب دووماهی ئینایە، و ل دویڤ رەوش و كاودانێن وی چاخی، لسالا (1950) دچیتە ئەسكەری یا توركان و ل دەڤەرا (قارس)ێ دبەتە سەر و پشتی دوو سالان ب دووماهی تینیت، و پاشی دزڤڕیتەڤە و ژنەكی ب عشق و ئەڤینی درەڤێت و، هەیامەكی ل گوندێ (كەسپیانش) ئاكنجی دبیت، و پاشی قەچاخ دبیت و دچیتە دەڤەرا زاخۆ و ل گوندێ (كەشان)ێ دمینیت و، ل دووماهی یا سالێن پێنجەهان ژنا وی (مریەم) دمریت و سێ بچویك هەدبن، پاشی ئەو دزڤڕیتەڤە ناڤ ژیریكییان و ژنەكا دی دئینیت، لێ (گۆزەل) دچیتە سەر هەقی یا خوە و هێشتا چ بچویك نەبووین، و چاخێ ژی یێ وی نێزیكی شێست ساڵان دبوو، كچەكا دی یا هەشتە ساڵی دڕەڤێت كو ناڤێ وێ (خەم) بوو و ب یەكجاری ل گوندێ خیزاڤا ل دەڤەرا زاخۆ ئاكنجی دبیت، و كچەك و كوڕەك ژ (خەم)ێ هەدبن، و دگەل هلبوونا چریسكێن شۆڕەشا ئیلۆنێ وەكوو دلسۆژەكێ وەلاتپەروەر بەشدارییێ تێدا دكەت و ناڤێ وی ب جوامێری و مێرخاسی بەلاڤە دبیت، و ل سالا (1974) دهێتە دەڤەرا گەڵالە و، پاشی كارەساتا (1975)ێ مشەختی ئیرانێ دبیت و ژینەكا سەخت و گران ل باژاڕێن جەهرۆم و خوڕەمشەهر و ئەسفەهان و نەغەدە دبەتە سەر... و د دووماهی یا ژی یێ خوەدا تووشی ئفلیجێ دبیت و ژكار دكەڤیت و ل بهارا (1990) دچیتە سەر هەقی یا خوە و پێنچ بچویك و پازرینەكێ مەزن ژ دەفتەر و رووپەلێن پڕ هۆزان و سەرپێهاتهی ل دویڤ خوە دهێلیت.

 

زانین و بەهرەمەندی یا وی

 (ئاشكا) هەرچەندە گوندەكی بچویك بوویە، لێ مزگەفتا وێ جهەكێ بنگەه خوەش بوویە ژ بۆ خویندن و زانینێ، لەوما خەلكێ قەست دكرێ و ل نك (بابێ هۆزانڤانی) دخویند، و بەری وی ل نك بابێ وی (مەلا عەبدوللا)ی... هۆسا ئەڤ مزگەفتە بوو وارگەهێ بچویكێ زانینا ئایینی و هۆزانا رەسەنا كوردی... هۆزانێن مەلایێ جزیری و، خانی و، باتەیی و، فەقێ تەیران.... لێ خوەجه ببوون، ژبلی دوڕ و مەرجانێن راوانبێژی یا هۆزانڤانێن عەرەب و فارس، مینا شەریف رەزی و فردەوسی و و شیرازی، كو فێربوونا هەردوو زمانان تشتەكێ فەر بوو ل فێرگەهێن كوردی ل وی چاخی.... ل ڤێرە هۆزانڤانێ مە ب پەیسكێن زانینێڤە چۆیە و ل نك بابێ خوە فێری زانین و تەرتیفێن ئەدەبیاتان بوویە و خویندنا خوە ب دووماهی ئینایە،لێ كارێ مەلا تییێ ب دلێ وی نەبوویە، لەوما چو جاران مەلاتی یا گوندان نەكریە، لێ هەردەم حەز ژ ئایین و دیانەتێ كریە و ب هەموو ئەركێن خوە رابوویە وەكو زانایەكێ ئایینی... لێ داگیركرنا وەڵاتێ وی و پاشكەڤتنا مللەتێ وی و بەلاڤبوونا دینێ ئیسلامێ یێ پیرۆز جهێ بالكێشی و خەمخۆری یا وی بوویە، هەروەكوو ئەڤ هزرە د هۆزانەكا خوەدا داڕێتین و نازناڤێ خوە كریە (دلبرین) مینا دبێژیت:

ئەز شاعرم دلبرینم

بۆ ئیسلامێ یێ ئەمینم

ڤێ دنیایێ پووچ دبینم

بۆ ئافرەتێ دل حەبینم

شاعرەكێ كورد پەروەرم

ژ نەفس پیسییێ دلبەدەرم

جەم هەڤالان دەربەدەرم

خودان رەئیا قەلەندەرم

ئەز مرۆڤەكێ شاعرم

نەزالم و حەرام خۆرم

ب رەحما خودایی شاكرم

ل علم و وەزعێ ماهرم

ل گوندێ (ئاشكا) بهارا هۆزانڤانێ مەیێ هێژا (دلبرین)ی خەمللی بوو، و ب مانا وی لبەر خوێندنێ ل نك بابێ وی، ئەو فێری گەلەك تشتان ببوو، لێ تشتێ ژ هەموویان مەزنتر ل نك وی، هەر دەنگێ زەلالێ نوونەرێن پەیڤا راست و دۆزا رەوایا مللەتێ وی بوون، لەوما پتری هەموویان حەز ل سەیدایێ مەزن (جەگەر خوین)ی دكر و كەفتبوو رێچا وی.... مینا دبابەتێ زولما توركاندا (سەورا كوردان 61-1966 ل6) دبێژیت:

وەتەنێ مە زێڕە

مەهێلا بوو ژ خەلقێڕە

قەبوول ناكن زولما ڤێرا

چەندەك كوشتن ژ خوەشمێرا

چاخێ جارا دووماهییێ هاتیە دەڤەرا زاخۆ و ل گوندێ خیزاڤا ئاكنجی بووی، و ژبەر ژێهاتن و جوامێری و خوەشمرۆڤی یا وی، بوویە ستوونەكا چڤاكێ و رووناكبیری یا پڕ هشیاری و ناڤ دایەڤە.... و دگەل هەلبوونا چریسكێن شۆڕەشا ئیلۆنا (1961) بوویە لایەنگرێ ڤێ بزاڤێ و ب هەموو هێز و زانینێن خوە پالپشتێ وێ بوویە، لەوما دبێژیت:

شوكر دارین خالق وەدوود

هاتن بۆ مە وەعد و عهوود

دەلیلێ قەومێ كێم وفوود

كانێ وەتەن، كانێ حدوود

یان چاخێ تاراتی یا پێشی وێ و ئەوان هێڤی یێن دووڤدا خویا دكەت و د بێژیت:

شەڤ نەبووری سەحەر نەهات

كوردان كرن كار و خەبات

مزگین ژ وە رۆژا وەهات

دا هوین ببن خودان وەلات

كورد تەیرێ بێ چەنگ ودمە

نەوان حوكمە نە حاكمە

بۆ خەلقێ مەتال و رمە

وەك شاه و خانێ دمدمە

زۆربەی هۆزانێن وی دڤی چاخیدا هاتینە نڤیسین، نەمازە ئەو داستانا درێژا ب ناڤێ (سەورا كوردان 61- 1966) و گەلەكێن دی، و ئەو یەك بوویە ژ شارەزا و گەرناسێن پەیڤا كوردی ل دەڤەرا زاخۆ ل سالێن شێستان و هەتا سەرەتایا هەفتییان، چونكی هەمی د تاریستانەكا زانستییێ دا دبووری.... هەروەكی نەفرەتا خوە ژ وەفدێ ئەدبیان دكەت كو ژ بەغدا هاتبوون ژ بۆ جەماندن و یەكگرتنا بزاڤ و شیانێن رەوشەنبیری و ئەدەبی ل دەڤەرێ.... بەلێ هۆزانا دلبرین زۆرا توندە ل سەر وی وەفدی، و وەسا دیارە ئەو وەفد ب ئالێ پاقژی یا وەلاتپەروەرییێڤە ب دلی وی نەبوویە هەروەكوو تێتە دیار كرن:

مێژوو چۆ بوو هەفتێ و سێیان

هەیڤا نەهێ رۆژا هەشتان

= = = = = =

= = = = = =

وەفدی ئەدیب تەفتیش كرن

تەفریق و عیناد چێكرن

هند چیرۆكێن دینا برن

ئەوان زانا ناس نەكرن

ئو چاخێ ل سالا (1974) جارەكا دی شەر دەست پێكریەڤە و پێلوەشا شۆڕەشێ دەست ب بەلاڤكرنێ كری، ئەو وەكوو شاعرەكێ مللی ل وێرێ هاتیە وەرگرتن. ل گۆر نڤیسارا پشكا راگەهاندنێ یا سەر ب ئەمینداری یا گشتی یا رەوشەنبیری و راگەهاندن و لاوان / رێڤەبەری یا ئیدارە و زاتییە، ب ژمارە (587) ل رۆژا (6/6/1974) و ب هەیڤانە (30) سیهـ دینار و، ل وێرێ دەنگێ وی یێ زەلال و پەیڤێن وی یێن شیرین ب رێكا ڤی ئیزگەهی ل سەر دەشت و چیایێن كوردستانێ بەلاڤ بوویە.... مینا دڤێ هۆزانێدا بەلاڤ دبیت:

بلبلۆ تو چەند هەڤالی

سوبح و ئێڤارێ دنالی

عاشقێ گولێت دەلالی

تێر نابی بێ رۆژ و سالی

ژ شامێ خوەشتر چو نینە

بلبلۆ وەتەن چو نینە

بەرزەبی، رێك بۆ تە نینە

چەند بكەی ئاهـ و نالینە

ئوو پاشی هۆزانێن وی ێین چڤاكی و ئەڤینی و دلێنی و وەلاتپارێزییێ ب رێكا ئێزگەهێن دەڤەرێ بەلاڤ دبوون، هەروەسا د ناڤ جڤات و خەلكی دا تاتنە گۆتن، چونكی یێ هۆزانڤان ژنێزیكڤە ناسكری باش دزانیت كو هەموو سوحبەت و ئاخفتنێن وی ب هۆزان تاتنە داڕێتن و هەردەم ڕەوشا جەماعەتان بوو، باكێشێ دەلیڤێن تەنگاڤ بوو....

پشتی كارەساتا (1975)ێ مشەختی ئیرانێ دبیت و ل ڤێرە هۆزانێن وی یێن رەشپۆش و رەزیل و مەلیل دەست پێ دكەن و هەردەم یێ ب دەڤ گلەیی و گازندە بوویە ل سەر بێ تفاقی و پاشڤەرۆی یا مللەتێ خوە، مینا ڤێ هۆزانێ یا ل (3/6/1977) ل باژاڕێ خوڕەمشەهر ڤەهاندی:

بوهار بووری، ئو ئاڤ كێم بوون

ل خوی باغان مەشخەل پێ بوون

پاهیز هات، ئو گول دێم بوون

ل سەر داران زەربەل چێ بوون

نە بەلچەم مان نەسورگول مان

نەریحان مان نە سونبول مان

نە چو باغێن ب چیمەن مان

نە بلبل و نە دیمەن مان

چیمەن زەر بوون ب ڤی كاری

دنیا مژە، بوویە تاری

ل سەر چیان بەفر باری

جەمەد چێ بوو ل رووباری

جەمەد چێ بوو ل حەودانە

خوسارێ گرتن زۆزانە

ژیان كێمە فەقیرانە

ب دەردێ خوە رەزیل مانە

هۆزانڤانی نازناڤێ خوە د هۆزانێدا دانییە (دلبرین)، لێ گەلەك جاران سیفەت و ناڤێن دی ژی ژ خوەڕا گۆتینە، مینا (مەلایێ ئەرتووشی، خادم كوردستان، خولامێ فەقیران، شاعرێ كوردان و... تاد) ، چ لبەر خوێندنێ و چ ب ئەگەرا دەربەدەرییێ و ژیانا مشەختییێڤە.... بدروستی فێری زمانێن دەڤەرێ بوویە (عەرەبی، فارسی، توركی) دگەل زمانێ ماكێ یێ شیرین و، ب هەر سێ زمانان هۆزان هەنە (كوردی و عەرەبی و فارسی) لێ من چو هۆزان، یان نڤیسین د ناڤ بەرهەمێن ویدا نەدیتینە كو ب توركی نڤیسیبن، هەرچەندە سەرجەما بەرهەمێ وی نها ل بەر دەستێن مەیە.

هنەك تایبەتمەندی و سیمایێن وی:

1- مرۆڤەكێ حەژ خوەكری بوویە و ب بهاترین جلوبەرگ دكرنە بەر خوە و هەردەم دەرسۆك و لەوەندی و كراس و شال و شەپكێن كوردی دبەردا بووینە و ژبەر مەردی یا خوە چو جاران خوە ب كێم و دەست كورت نیشا نەدایە و هەردەم عاشقێ رەنگان و جوانییێ بوویە، و گەلەكی نەفس بچویك بوویە.

2- مرۆڤەكێ ب هەیكەلێ كەلەگەت بوو، ناڤێ وی ب مێرخاسی و جوامێرییێ چۆ بوو، و گەلەك رویدان و بوویەر ل سەر فێهرسی یا وی هەنە د شەڕان و دیسان دەلیڤێن تەنگدا.... نەمازە ل شەڕێن شۆڕەشا ئیلۆنێ و ل دەڤەرا زاخۆ، و تێتە ڤەگێڕان كو چەوا جارەكی ب گۆپالی دڕندەترین سێ رێگر ژ چەك كربوون و ئاڤروی یا وان بربوو كو ئیدی وان ئەو كارێ چڤێل ب جه هێلایە....

3- گەلەك روومەت خوەش و هەردەم دەڤ ب كەنی بوویە، هەتا سەرهاتی و كەنی و سوحبەت و ترانە و حەنەكێن وی ژ حەدی بدەر بووینە، و گەلەك جاران جهێ گازندە و گلەییێ بوونە ل نك زانایێن ئایینی... كو هند كەنی و تڕانە دخرابن و بۆ خودانی گوناهان چێ دكەن، مینا ئەو بخوە دبێژیت:

ب سوحبەتا خوە شەكرم

تانجێ پیسان هەلناگرم

4- گەلەك حەژ ژنان كریە و سێ ژن ئیناینە و هەرسێ ب عشق و ئەڤینی و، رەڤاندینە، نەمازە چاخێ ژنا دووماهییێ رەڤاندی، ژی یێ وی ژ پێنجەه سالان پتر بوو، دیسان هۆزانەكا درێژ هەر ب كچكەكا تورك دبێژیت كو چەوا چاخێ ژ بابێ وێ خواستی و ئەوی قەبوول نەكری، چونكی چل ساڵ پتر دناڤبەرا واندا هەبوون.... دیسا حەژ كچەكا دی دكەت و داڤێن دلێ وی ب عشقەكا پاكژ تێنە رێستن، چاخێ ل ئوردوگایێن پەنا بەرانڤە دبێژیت:

سەد ئافەرین نەعیمایێ

خودانا بەژن و بالایێ

ژ چادری چۆ سەرایێ

تە نەبینم سەبر نایێ

یان چاخێ دهۆزانەكا دیدا دبێژیت:

كەسێ بێ ژن غیرەت نینە

ل نك ئەهلێ خوە چو نینە

ئەو بەرهەمێن ل دویڤ خوە هێلاین:

1- سەورا كوردان (61- 1966) ئەڤ دیوانە دیارییە بۆ بارزانی هەر وەكوو ل یەكەم رووپەل ب عەرەبی هاتیە نڤیسین و دیسان ئەڤ ئایەتە ل سەر هەیە (وانێ مرسلە الیكم بهدیە فناظرة بم یرجع المسلمون- صدق اللە العظیم)، و دیسان ئەڤ بەیتە ل دویڤ وێ ئایەتێ هاتیە نڤیسین:

سلام، واهدأ السلام في البعد

دلیل علی حفظ المودە والعهد

ئوو ناڤەرۆكا ڤێ دیوانێ ژ پێشەكییەكێ دەست پێ دكەت كو (24) بەیتن، پاشی مەتن دابەش دبیت ل سەر (72) بابەتان، كو هەموو ب هەڤڕا دگەهتە (1494) هزار و چار سەدو نوهت و چار بەیتان.

2- سەرهاتی یێن شارێ زاخۆ (61- 1972) ئەو ژی شەش بابەتن، ئەوا دسەرەتایا وێدا دبێژیت:

سەورەیەك چێ بوو ل زاخۆ

ب هندە قائیدێن نەزان

= = = = =

ئوو دووماهییێ دبێژیت:

ژڤان ئەدیبان سل نەبن

بەلكی هند ئەزمان زێدە بن

دلبرین ئەهلێ كوردانە

لەو بەركارێ فەقیرانە

پالەیێ بێ ئاڤ و نانە

عاشقێ خاسیەتا جانانە

3- بەیتێن شەهیدان كو ژ (10) دەهـ هۆزانێن درێژ پێك تێت، ئەو ژی ئەڤەنە (شەهید بوونا چار ئەفسەران ل سالا 1947) (قەسیدا شەهیدێن مەزلووم) (شەهید سەعید ئالچی) (شەهید بوونا عیسا سوار) (شەهید بوونا مار شەمعوون) (شەهیدێ كوردستان بارزانی) (شەهیدێن گوندی دەكا 1969) شەهیدێن گوندێ سۆریا (شەهیدا عشقێ نەفیسا) (شەهیدێن دیاربەكرێ).

4- بەهسا غەدر و خیانەتا توركان دگەل مللەتێ كورد، ئەو ژی ژ پێشەكییەكێ و (17) هەڤدە بابەتان پێك تێت، كو د سەرەتایا وێدا دبێژیت:

ئەی گەلی كورد و بران

هون گوهـ بدن ڤان شعران

دلبرین دێ كەت بەیان

زولما ژ دەستێ توركان

5- بەهسا ڤیانا دلبرین بۆ ئەلیفەكێ و دوو میمان.... هەر وەكوو دیار دهۆزانێن ویدا، مەبەست ژ ئەلیفێ ناڤێ خودێیە كو (اللە)ـە، و دوو میم ناڤێ پێغەمبەرییە (محمد) ئەڤەژی (110) سەدو دەهـ بەیتن كو دسەرێ وێدا دبێژیت:

هەدیە هەنە چەند قڕن و زەمانە

دیاری رەسمن ل گەل دۆستانە

بۆ خاس و عامییا مال و پارەنە

یا (ص) و (میمان) ب چار حەرفانە

6- بەیتا مشەختان كو ژ (10) دەهـ هەلبەستان پێك تێت و یەك ژوان ب ناڤێ (چیرۆكامە)یە كو (131) سەد و سیه و یەك بەیتن كو دسەرەتایا وێدا دبێژیت:

ئەو مهاجرێن بێ چارە

بوون فەقیر و هەژارە

خودا ناڤێ تە جەبارە

یان دبێژیت:

ئەی خالقێ خودان كەرەم

تەبیبێ دەردان و ئەلەم

كەرەمدارێ هەردەم ب دەم

تو دەرمان كە دلێت ب غەم

تو دەرمان كە هەمی غەما

عەمرێ بووری چو نەما

خاس ژیانا ناڤ عەجەما

درەو هاتن راستی نەما

7- دیاری بۆ یازدەی ئادارێ.... ئەوا د دووماهی یا وێدا دبێژیت:

شاعرێ كوردان تو عاجز نەبە

ژوان سەر شۆڕان چو جاران نەبە

خزمەتا قەوم و مللەتێ خوە بە

ل گەل موخلسان هەرگاڤ پاڵە بە

8- كۆمەلا هۆزانێن دلینی و چڤاكی كو نێزیكی (200) دوو سەد هەلبەستانە.

9- سولتانێن نەزان... ئەڤە ژی هۆزانەكا درێژە و ئەمێ هنەكێ ژێ بەلاڤكەین:

دنیا ل من دوو سەعەتە

روحا عەبدان ئەمانەتە

مەرگ و مرن بێ موهلەتە

لازم بكین ئیتاعەتە

ئیتاعەتێ ڤێت ئەم بكین

فەرزێت خودا بەرزە نەكین

كار و زەوادێ كار بكین

عاقووبەت هەر ئەم دێ مرین

ڤێت گوهدار بین هێژ نەمرین

سەفەر دوورە مەجبوور دچین

بەلكی ب ئیمان بمرین

پووشمانی دونیایێ نەبین

پادشاهێ خودان كەرەم

ئەمرێ تەیە لەوح و قەلەم

دختۆرێ دەردان و ئەلەم

كارێ تەیە دان و عەدەم

هەتا دگەهتە....

ئەی خودایێ عالی جەناب

رەببێ عەبدێت چاك و خراب

تو هەر هەی بێ دای و باب

دنیا تە دا دێ كەی خراب

هەتا هۆسا ب ڤی رەنگی ب دووماهی تینیت...

كەسێ فكر و عەقل هەبیت

ڤێت ژ خودا غافل نەبیت

ب حوكمێ خوە غروور نەبیت

دا وەك قاروون بێ گۆڕ نەبیت

ئەڤە ب كورتی ژیان و خەبات و بەرهەمێن هۆزانڤانێ مللی یێ كوردپەروەر، ئەمێ دەینینە بەر دەستێن وە یێن هێژا... هێڤی یا مە ئەوە كو تەڤ بەرهەمێن وی بێنە تویژاندن و نڤیسین و... ئەڤ سیمایێ وندابوون و بەرزەبوونێ ل سەر گەلەك ئالێن دیرۆكا ئەدەبیاتێن مە بێتە هەلاندن...

تێبینی:

پشتی وەغەركرنا هۆزانڤانێ مە (مەلا سدیق)ی ب چەند رۆژان، ب رێكا چەند دۆست و هەڤالان تەڤایا بەرهەمێن وی گەهشتنە دەستێ من، و هەر ژ هنگیوەرە من دەست ب ڤەكۆلین و تویژاندن و نڤیسینا وان كریە، دوەختێ خوەدا من ئەڤ گۆتارە ئامادە كر و بۆ گۆڤارا (سروە) ل ئورمییە هنارت، لێ پشتی هەیامەكی بەرسڤا وان گەهشتە من كو دەبی ژینەنیگارا وی بێتە گوهارتن، چونكە، ئەوی سێ ژن رەڤاندینە ئانكو بێ شەرعی هەلگرتینە و ئەڤە ژی دئیسلامێدا حەرامەو كەسانەكێ هۆسا مورتەد حسابە.

من پێگیری ب نڤیسینا خوەیا بەرێ كر و چو تشت نەگوهارتن، دویڤدا، من هنارتە گۆڤارا پێشەنگ، لێ ژكار راوەستا و دەرنەچۆ، چەند پەرەگراف درۆژنامەكێدا بەلاڤ بوون، لێ رۆژنامە بخوە بەلاڤ نەبوو، لەوما ڤێ جارێ ب بەلاڤكرنا ڤێ گۆتارێ، ئومێدەوارم قەرزەكێ هۆزانڤانی ل سەر ملێن خوە هلینم، بەلكوو ببیتە سەرەتایەك ژ بۆ ڤەكۆلین و تویژانەنێن بەرفرەهتر و بەلاڤبوونا بەرهەمێن وی.